Litt fakta om Husnes

SØRAL og Husnes båthamn (Foto: Ann Helen M. Olsen)

Husnes er den største tettstaden i Kvinnherad med omlag 2500 innbyggjarar og ligg ved innseglinga til Hardangerfjorden. Husnes er handels-, skule- og idrettssenteret i kommunen, og har eit stort utval av tenester. Ei bygd i rivande utvikling med stor byggjeaktivitet.  Her ligg Sør-Norge Aluminium (SØRAL), som er største private arbeidsplassen i kommunen. Om lag 400 tilsette produserer ca. 165.000 tonn aluminium kvart år.

Industribygda Husnes er praga av kulturelt mangfald - få bygder har fostra så mange rockeband og artistar som Husnes. Mange kulturaktivitetar og eit levande musikkliv set sitt preg på bygda. Diktaren Jonas Lie budde her i sine barne- og ungdomsår. 

Idrettsnalegget er omringa av skular og barnehagar (Foto: Geir Berntzen)

Husnes har eit aktivt idrettsmiljø med to idrettsbanar, idrettshall, symjehall og roarena ved Opsangervatnet.  Husnes har kunstgrasbane og ei flott golfbane som er svært populær. Her ligg og Kvinnherad vidaregåande skule med omlag 500 elevar fordelt på fleire studieretningar.

Husnes er eit fint utgangspunkt for fjellturar. Fleire merka løyper er tilrettelagde for heile familien. I Opsangervatnet kan ein prøva fiskelukka etter innlandsaure. 

Husnes Storsenter

I tillegg er Husnes størst Sunnhordlands handelssenter. Her finn du det meste du skulle trenge med over 50 spennande butikkar som tilbyr eit stort utval av godbitar for heile familien, hotell, camping, fleire restaurantar, idrettsanlegg, helsesenter og offentlige kontor. Husnes Storsenter er fortsatt under utbygging.